Bestalde, ezpata-dantzak -hauetako batzuk Dantzari Dantzak aztertzerakoan aipatu ditugu- dibertsifikatuta daude eta Europa mailan egiten diren mota bereko dantzekin antzekotasun nabarmena dute. Gipuzkoako Ezpata Dantza ezezik, Zumarragakoa, Legazpikoa edo Xemeingoak ere ezpaten erabilerari buruzko lekukotasun-funtzioa betetzen dute; Lesakako Makil gurutzean, Debako San Roke Dantzan eta Tolosako Bordon Dantzan nahastu egiten dira dantza erritualaren erabilpen zeremoniatsua eta jai-erabilpena eta ez dute alde batera uzten herriko gainerakoek dantza-kolektibo bakoitzeko kideekiko izan behar duten errespetua, laguntza eta parte-hartzea.
