Oroitza Txostena eta Jarduera Plana

2009ko Oroitza Txostena

Azaltzea eta ulertzea, hori dugu Behatokiaren erronka. Errealitatea ulertzen saiatzeko ekintzan, gertatzen denaren berri emateak euskarri gisa jokatzen du.  2009an, hainbat alderdi elkartu dira ekoizpenari dagokionez, zehazki, oinarrizko estatistika-informazioaren sorkuntza eta haren geroagoko azterketa, bigarren mailako iturriek emandako informazioaren tratamendua eta azterlan kualitatiboak. Sektore-eremuko, ikerketa-eremuko eta nazioarteko eremuko hainbat aditu eta ordezkarirekin batera egin du Behatokiak ibilbide hori.

Egindako lanak EAEko kultura-sektorearen argiak eta itzalak utzi ditu agerian, duela gutxi arte alde batera uzten genituen fenomeno jakin batzuen garrantzia neurtzen lagundu digu, eta errealitatea beste begi batzuekin begiratzen eta gero eta abiadura handiagoz gertatzen ari diren aldaketekin kontu handiagoa izaten irakatsi digu, aldaketa horiek gure ziurtasunak zalantzan jartzen baitituzte eta askotan harrituta uzten baikaituzte. Ziklo-aldaketak edukiak ekoizteko eta hedatzeko moduetan, gure jokabideetan eta bizimoduetan, eta nagusi diren balioetan.

Aztertu ditugun datuek hainbat gairi buruzko informazioa ematen digute, gure kultura-industriek ekoizten dutenari, sortzen duten enpleguari eta duten fakturazioari buruzkoa, antzerkiaren, musikaren, eta ikusizko arteen alorreko programatzaileen jardueraren berezitasunei buruzkoa, eta erakunde publiko nagusiek kulturan egindako gastuari buruzkoa, hain zuzen ere. Kultura-kontsumoaren ohiturei eta ereduei buruzko hausnarketa egin da hainbat ikuspegitatik, kulturaren erabileren azterketan aurrera egiteaz gain.

Bestalde, ekindako azterlan kualitatiboek beste hainbat testuingurutan jazotzen dena ulertzen laguntzen dute. Sorkuntzan laguntzeko beste hainbat herrialdek dituzten formulen azterketak hainbat argibide ematen dizkigu EAEn gauzatzen diren politiketan berrikuntzak sartzeko, eta gazteen kultura-kontsumoko berezitasunak ezagutzeak mamitzen diren joeren berri ematen digu.Geure buruari begiratzeko ispilu bat sortzen ari gara. Islatutako irudian geure burua ezagutuko ote dugu?

Kultura Behatokiaren 2009ko Oroitza Txostena (pdf, 67 KB)

2008ko Oroitza Txostena

Bi urte pasatxo dira Kulturaren Euskal Behatokia sortu zenetik, eta 2008ko urtearen amaiera ez da erakundearentzat jarraipen soila izan. Zalantzarik gabe, denboran aurrera egitea funtsezkoa da edozein proiektu gauzatzeko, eta bide horretan da, dagoeneko, Behatokia. Hala, bada, programa estatistikoak lehen emaitzak jasotzeari ekin dio. Bi arretagune izan ditu 2008ak: batetik, kulturako produktuen eta zerbitzuen eskaera ezagutu nahi izan da. Alde horretatik, oso informazio baliagarria eskuratu da jada, herritarren ohiturak eta praktikak haztatzeko. Bigarren arretagunea, berriz, lehenengoaren ifrentzua da, alegia, kultura-eskaintzari buruzko informazioa jasotzea. Horretarako, bi eragiketa estatistiko berri bultzatu dira, arteen eta kultura-industrien eremuko arlo zehatzak ezagutzera emateko xedez. Azken batez, emaitzak aztertzeko arloa eta ikerketa nahiz eragiketa berriak diseinatzeko arloa bateratu dira, bateratze horren bidez, pixkanaka-pixkanaka informazio-sistema osoa eratzeko asmoz.

Informazioa hedatzeko jarduera Behatokian berria ez bada ere, aurtengoan nabarmen sendotu da arlo hori. Hala, esate baterako, ohituren azterketari buruzko emaitzak landu, eta paperean argitaratzeko prestatu dira. Ekimen horren bidez, bada, aurrerapauso handia egin da produktu-ildo berria ekoizteari ekiteko, eta kulturari buruzko estatistiken eta azterketen bilduma izan da horren guztiaren lehen fruitua. Behatokia, bestalde, ezagutza handia metatzen ari da gutxinaka-gutxinaka, eta osagai ukiezinez eratutako ezagutza-meta hori emaitza bikaina ari da ematen, hainbat kultura-eragilerekin batera osatutako lan-sareetan eta proiektuetan hezurmamituta.

Hona ekarri den oroitza-txostenak 2008an gauzatutako lana du aztergai, urte horri dagozkion jarduketa-planeko helburuak eta konpromisoak oinarri hartuta. Hala, aldi horretan lortu diren helburu nagusiak laburbiltzen ditu, horien gaineko balioztapena eginda; horrez gain, 2008an emandako aurrerapausoak azaltzen ditu, hainbat adibide eta datu adierazgarriz lagunduta.

Kultura Behatokiaren 2008ko Oroitza Txostena (pdf, 504 KB)

2009ko Jarduera Plana

2009an, KEBren ibilbidean etapa berri bat hasi da. KEB proiektua 2006an gauzatu zen kulturaren eta haren sektoreen informazio-sistema erregularra eta egituratua edukitzeko beharrari erantzuteko.

Behatokiak diseinatutako eta kultura-eragileekin egiaztatutako estatistika-esparruaren ikuspegi globala eta sistemikoa hartzen du erreferentziatzat etapa horrek. Ikuspuntu orokor batetik, behaketa-ziklo bat hasten da, eta, helburua kulturaren ikuspegi orokor bat lortzea duenez, beharrezkoa du egungo testuinguruan kulturari sortzen zaizkion eztabaidei, joerei, erronkei eta erabilera berriei adi egotea. Jarrera honek ezagutza eta jokabide kritikoa izatea eskatzen du, eta Behatokiak, baldintza horiek indartzeko, kontrastegune, hausnarketagune eta eztabaidaguneak irekiko ditu kulturaren alorreko espezialista eta aditu garrantzitsuekin.

2009KO JARDUERA PLANA (pdf 117KB)